Assam chief minister Himanta Biswa Sarma-a'n Assam Congress president Bhupen Borah chuan kum 2025 ral hmain BJP a zawm dawn tia a sawi avangin, Borah hian CM lakah inpuh hmingchhiatna thubuai a theh lut dawn tih a sawi.
Bhupen Borah chuan Jorhat-a thuthar thehdarhtute a kawmnaah CM Sarma chu thil pawimawh zawk kal kânin hetiang thu dik tawk lo sawi hi a ching a ni, a ti. CM lakah hian thubuai a theh lut dawn tih sawiin, ṭanchhan mumal nei loin Chief Minister chu a ṭawng mai mai ṭhin niin a sawi bawk.
Borah chuan BJP a zawm ngawtna chhan tur engmah a awm lo tih a sawi a, mipuite harsatna an sutkiansak dawn lo tih a hriat avangin BJP chu a zawm dawn loh thu a sawi zui bawk. BJP chu inthlan hmaa an thutiam tihlawhtling ngai lo leh, Assam leilung fate hamṭhatna ngaihtuah ngai loah a puh bawk. Assam CM chuan inthlan hmaa a thutiam a hlen loh avangin boruak dang siam tumin hetiang zawng hian a ṭawng chhuak ta mai a ni, a ti.
Chief Minister hi Lakhimpur-a thuthar thehdarhtute'n kum 2026 Assam assembly inthlan huna Congress hotupa Borah nen an inkhin tur chungchang an zawhna a chhannaah, Borah chuan kum 2025 ral hmain BJP a zawm dawn tiin a sawi a ni. Hei bakah kum 2026-ah chuan Hindu tamna laiah Congress chu an ral dawn niin a sawi a, kum 2032-ah chuan Muslim tamna bialah pawh Congress chu an ral dawn a ni, a ti bawk.
