Hmarchhak MP zingah Arunachal MP-te session-ah kal tlem ber : ADR

Association for Democratic Reforms (ADR) leh National Election Watch (NEW)-te'n Parliament chhunga Members of Parliament (MP)-te chet dan an zir chianna“17th Lok Sabha: Analysis of Performance of MPs” an tihchhuahah Arunachal Pradesh aṭanga MP pahnihte chu session kal tlem ber an ni. Session kal ṭhat leh ṭhat loh bakah hian session neih laia zawhna an neih zat aṭangin MP zinga che ṭha thlan chhuah an ni.

Arunachal MP pahnihte hi vawi 273 ṭhut khawm awmah vawi 127 chiah an kal tih tarlan a ni a, hmarchhak state dang zingah Assam MP-te chuan vawi 224 kalin, Megalaya MP-te chu vawi 212 an lang a, Tripura leh Manipur MP-te chu vawi 173 leh 206 an tel tih tarlan a ni bawk.

State khat aṭanga MP an neihte'n house chhunga zawhna an neih zat chawhrualah Manipur chu hmarchhak state zinga a hniam ber niin, chawhrualin zawhna 25 chauh an MP-te'n an nei. Chawhruala zawhna nei tam ber chu Tripura MP pahnih niin anni hian zawhna 173 an nei anga chhut a ni a, Assam MP 14 chuan dawtin anni hian zawhna 148 nei anga chhut a ni bawk. MP pahnih ve ve nei Meghalaya leh Arunachal Pradesh chu pathumna leh palina niin an MP-te hian chawhrualin zawhna 120 leh 51 nei anga chhut a ni. 17th Lok Sabha-ah khan MP zawng zawng, 559 chuan chawhrualin zawhna 165 nei anga chhut niin ṭhut khawm vawi 273 awmah vawi 189 kal anga chhut a ni bawk.