BJP hian India danpui tihdanglam an duh : Meghalaya Congress President

Meghalaya Congress president leh Shillong MP ni lai, Vincent Pala chuan Lok Sabha inthlan lo awm turah hian BJP chu hneh taka thlan tlin an nih chuan India danpui chu tihdanglam an duh tih a sawi.

Pala hian nomination a file zawhah thuthar thehdarhtute nen inkawmin, BJP-in MP tam tak neih an tumna chu a hlawhtlin a rin loh thu a sawi a, anmahni party chhunga buaina avangin BJP chu a hma anga an chak loh bakah hmarchhak state-ah candidate an nei ṭha lo tih a sawi bawk. BJP-in seat 370 aia tam lak an tumna chhan chu India danpui tihdanglam an duh vangah a puh a, constitution aṭanga sakhaw en hran bik awm lo tura tihna thumal awm chu paih an duh tih sawiin, chu chu Hindu lalram din an tumna atana kawng pawimawh tak a ni, a ti.

Congress president chuan BJP sorkarna hnuaiah India chu Pakistan leh Bangladesh ang maia sakhaw pakhat chauh vawn phalna anga a chhuah mai a hlauh thu a sawi. Pala hian prime minister Modi pawh a bei tel a, ram mipuite hmasawnna aia Ram Mandir ngai pawimawh zawkah puhin, heng avang hian sakhaw intluktlanna chu a derthawn thu leh, hmasawn zawngin India chu a kal theih loh phah niin a sawi.