Arunachal Pradesh Agriculture Marketing Board (APAMB) leh Dubai-a awm, Lulu Hypermarket LLC te chuan World Food India 2023 neih karah thawh dunna tura inremna, Memorandum of Understanding (MoU) an ziak. An inremnaah hian Arunachal Pradesh-a loneitute thlai thar leh thil dangte hralh leh lei kawngah an pui dawn a ni.
MoU-in a tum a tarlan zingah Arunachal Pradesh-a serthlum leh mai bakah thlai thar dang hrang hrangte Gulf rama hralh chhuah chu an tum ber a ni. Lulu Hypermarket te hian heng thlaite hi Arunachal Pradesh aṭang hian an leisak ṭhin ang. MoU ziahnaah hian APAMB chief executive officer, Okit Paling leh Lulu Hypermarket LLC chief managing director, Zulfikar Kadavath te chuan hming an ziak a, anni bakah hian industry hruaitu leh sorkar official eng emaw zatin an telpui bawk a ni.
He inremna hian AP-a loneitute leh thlai thar zuar ṭhinte tan kawng a hawn belh nasa dawn hle a, khawvel pum huapin an thil thar chhuahte an zuar thei tawh dawn a ni. Lulu Hypermarket hi sumdawng intel khawm lian tak niin khawvel pumah an inzar pharh a, an sumdawnna hian US dollar billion 8.5 chuang la lut tawhin, hypermarket 200 chuang an nei bawk.
CEO Paling chuan Lulu nena inremna an ziak thei chu phurawm a tih thu sawiin,"He inremna hian kan rama lo neia eizawngte tana kan hmalakna hlawhtlinna a rawn tilang a ni. Khawvel hmun danga kan thlai tharte zawrh chhuah kawng mai bakah kan state-a agriculture sector ṭhan nasatzia a lantir bawk," tiin a sawi. Paling chuan APAMB leh Lulu group te inzawmna hi December 1, 2022-a Dubai-a serthlum zawrh tur an thawn aṭanga a inṭan tawh thu a sawi bawk. Lulu Hypermarket LLC thupuangtu pawhin India rama agriculture sector ṭhan theih dan chu an hmuh thiam thu sawiin, inremna an ziah tak hian thil leitute tana eitur ṭha leh thar lam chhawp chhuah a nihna tur kawng a hawn thu a sawi ve bawk.
APAMB hian Singapore-a an thlai tharte thawn theih dan tur kawng pawh a zawng reng a, Guwahati aṭanga Singapore kal bungraw phur thlawhtheihnna pawh ruahman an tum. CEO Paling hian kumin chhunga Bangalore pawh serthlum khawpui (Orange city)-a siam an tum thu sawi bawkin, Swiggy te nena inremna siam a, serthlum metric ton 80 thawn theih an tum a ni.
