Ukhrul Shirui khuaah sa kah khap

Ramngaw hausakna, sava leh ramsa te humhalh a nih theih nan, Manipur-a Shirui khua chuan an ram huam chhunga sava leh ramsate chu kum thum chhung atan kah phal a nih loh thu an sawi.

Shirui hi Imphal aṭanga km 97-a hlaa leh, Ukhrul khua aṭanga km 18-a hlaa awm a ni a, an khua hi pangpar mawi tak, mang mai hlauhawma awm Shirui lily pangpar avanga hmingthang niin, heng pangpar te hi Shirui peak leh Shirui Kashong-ah te hmuh tur an awm a ni.

Sa leh sava kah khapna thupek an chhuah rual hian Shirui thuneitute hian air gun leh silai lam chi reng reng hman khapna an chhuah bawk a, hei hi nungcha humhalhna lama an hmalakna atana an tih a ni. Shirui khaw thuneitute hian Ukhrul divisional forest officer hnenah ziaka lehkha thawnin, he an hmalakna endik leh kenkawh kawnga puitu tur, drone hman tur pe turin an ngen bawk.

Hemi chungchang hi Manipur chief minister, N. Biren Singh chuan Facebook-ah tarlangin, "Manipur-a a vawi khat nan Shirui khaw mipuite chuan an ram chhunga sa leh sava kah khapna an tichhuak. Hei hi ramngaw leh nungcha humhalhna kawnga thil pawimawh em em a ni a, an hmalakna avang hian kan nungchate humhalhin an awm thei dawn a ni," tiin, Shirui khaw mipuite hmalakna chu a fak thu leh, an thiltih chu Manipur state leh a piah lam thleng pawha mite entawn ni thei se a duh thu a sawi a ni.