Conrad Sangma-a'n NCC car rally vai liam

Meghalaya chief minister Conrad K Sangma chuan National Cadet Corps (NCC) kum 75 tlin lawmna ni pah fawmin, Shillong-a North Eastern region car rally neih tur a vai liam. Rally hi November 26-ah Guwahati, Assam-ah a tawp ang.

Car rally hian state paruk a huam dawn a, district 44 aṭangin sikul 277 leh college 151 an tel a ni. Rally vai liamnaa thu a sawiah, Sangma chuan NCC-in ram tana an hnathawh ṭha tak chu a fak a, NCC mi leh sate'n cultural programme an buatsaih ṭhin chu hlu a tih thu sawiin, an kal chhunzawmna turah duhsakna a hlan bawk. Official-te chuan rally thil tum ber chu hruaitu ṭha chher chhuah bakah, inṭhianṭhatna siam te, infiamna thinlung dik entir leh nun thothang ṭha nei tura ṭhalaite ngaihtuahna siamsak a nih thu an sawi. NCC dinna vawng nung chunga ram leh hnam rilru pu tlat tura ṭhalaite fuih chu an tum a ni an ti bawk.