India rama US ambassador, Eric Garcetti chuan Ningani khan Kolkatta-a American Center-ah thu thar lakhawmtute kawmin, Manipur-a buaina thleng mekah US puihna dil a nih chuan pui turin an inpeih reng tih a sawi a, hemi rual hian he thil hi ramchhung thil a ni tih a sawi nghal bawk.
Eric Garcetti chuan, "US chuan Manipur-a buaina thleng mekah mihring chengte dinhmun a ngaihtuah em em a, amaherawhchu hei hi India rama thleng a nih angin India chinfel tur a ni. Ṭanpui an dil a nih chuan pui turin kan inpeih reng thung a ni," tiin a sawi.
US palai hian thla hnih chhung Manipur-a buaina chhuakah inbeihna leh thihna tam tak a thleng a, state chhunga tlem zawk Kristiante beih an ni hi US tan inrawlhna tur niin i ngai em? tia press mite zawhna a chhannaah he thu hi a sawi a ni.
Garcetti chuan Manipur-a remna leh muanna a awm leh vat a beisei thu a sawi a, chu chuan hmasawnna hnathawh leh investment siamna kawng pawh hawng leh vat thei tur a nih thu a sawi bawk. "Manipur chungchangah chuan boruak ralmuang a awm thuai theih nan kan ṭawngṭai a, US inrawlhna tur a ni em tih thu-ah chuan thil dang zawng aiin mihring an nih ve avangin US hian a ngaihtuah ve chu a ngai a ni," a ti.
"Manipur-a buaina chhuak vanga thite kan hmuh hian, ngaihsak turin Indian nih kher a ngai lo. Hmarchhakah hian hmasawnna nasa takin a hmuh theih a ni, he ram hian thil ropui tak tak pawh a lo ti fo tawh bawk. Mahse hmasawnnate hi remna leh muanna tel lo chuan a kal chhunzawm thei lo a ni," tiin Garcetti hian a sawi bawk.
