Manipur chungchang sawiho phutna hnawl vangin Parliament panel meeting aṭangin eptu MP-te chhuak

Parliamentary Standing Committe on Home ṭhut khawmnaah Manipur buaina chungchang sawi an phutna hnawl a nih avangin, eptu MP pathum chu lungawi loin an chhuak.

Meeting neihna aṭanga chhuakte hi Congress MP, Digvijaya Singh leh Pradeep Bhattacharya bakah Trinamool Congress MP, Derek O'Brien te an ni.

Committee chair­pserson, BJP MP ni bawk, Brijlal chuan meeting chu 'Prison - Conditions, Infrastructure and Reforms' chungchang sawiho tur leh Andhra Pradesh, Telangana leh Tamil Nadu prison official-te thurawn ngaithla tura ṭhu khawm an ni a, agenda nei sa an nih avangin eptu MP-te thil phut angin an thurel tur an thlak theih tawh loh thu a sawi. Brijlal chuan July 27 leh 29-ah pawh prison official dangte nena meeting nei leh tura ruahmanna an neih thu a sawi bawk.

MP-te hian Manipur buaina chungchang sawiho a nih hma chu meeting an tel theih dawn loh thu an sawi a, committee chairperson hnenah hian lehkha pawh theh lutin, Manipur chungchang sawi chu thil hmanhmawhthlak zawk a nih thu leh, an thil tih chu hruaitu leh dan siamtu an nih anga tih makmawh niin an sawi. "Rel tur nei sa kan ni tih chu kan hria a, mahse, ram pum huapa thil pawimawh em em sawiho lo a, chhuanlam siama thil dang sawiho hi kan duh loh avangin meeting kan chhuahsan ta a ni, " tiin an lehkhaah hian an ziak.

Derek O'Brien leh Digvijaya Singh-te hian thla hmasa khan Brijlal hnenah hian Manipur chungchang sawiho tura meeting ko vat turin lehkha an lo thawn tawh bawk. MP-te hian tan in harsatna chungchang sawi chu pawimawh an tih rualin, Manipur buaina chu a pawimawh hmasa zawka an hriat thu an sawi a ni.