Tripura: Speaker-in MLA 5 hrem, eptute House aṭangin chhuak tau

Tripura budget session neih mekah, nimin khan Assembly speaker Biswa Bandhu Sen chuan eptu MLA panga chu rorellai tibuaia puhin a suspend a, hei vang hian eptu party hrang hrang MLA-te chu lungawi loin House aṭangin an chhuak tau.

House-a inhnial buaina hi leader of opposition, TIPRA MLA Animesh Debbarma-a'n March thlaa session neih laia House chhunga a phone-a video mawi lo tak lo entu, BJP MLA Jadab Lal Nath chunga action lak a nih dan chungchanga ajournment motion a put luh a zawh fiahna aṭangin a chhuak a ni. Speaker hian eptu hruaitu zawhna hi chhang loin, thu an sawi zawm a phalsak lo a, finance minister Pranajit Singha Roy chu budget pharh turin a sawm san a ni.

Hei hi duh loin, eptu MLA-te chu House laiah chhuak khawmin, BJP MLA Nath chungah action lak ngei an phut thu an aupui zui bawk. TIPRA MLA pahnih, Brishaketu Debbarma leh Ranjit Debbarma chu dawhkanah an lawn a ni.

Eptu member-te'n lungawi lohna lantira an au buai chhunzawm avangin, Chief Minister Dr Manik Saha chuan Speaker hnenah eptu MLA pangate chu session aṭanga hrem turin a ngen a, House zahawmna an tibawrhbang niin a sawi.

CM-in a sawi hnuah, Speaker chuan Congress MLA Sudip Roy Barman, TIPRA MLA pathum - Birshaketu Debbarma, Ranjit Debbarma, leh Nandita Reang, keh CPI-M MLA Nayan Sarkar-te chu session neih meka tel chhunzawm thei lo turin a hrem zui ta a ni. Speaker thutlukna siam duh loin, eptu member-te chuan House an chhuah san zui nghal a ni.