Ni hnih ch am tura Manipur-a zin, Congress party hruaitu Rahul Gandhi chuan nimin khan Churanchandpur tlawh a tum a, mahse, Bishnupur-ah Manipur police-te'n an lo dang. A hnuah helicopter hmangin Churachandpur hi a pan a ni.
Rahul Gandhi hian nimin zing khan Manipur hi a thleng a, tualchhung buaina chhuak vanga in leh lo tlanchhiat san, relief camp-a awmte tlawh turin Churachandpur kal a tum a ni. Mahse police-te'n a kal kawngah buaina a chhuah palh venthawn thilah Imphal aṭanga km 20 vela hlaah an lo dang. Hei vang hian Imphal lamah an kir leh a, helicopter-in a kal leh ta a ni.
Police-te chuan Bishnupur district-a Utlou khaw bulah kawngpuiah mi ṭhenkhatin motor ke halin, Gandhi convoy hi lungin an lo tawng a, kawng lakah buaina nasa zawk an tawh palh hlauhthawn vangin an kal zel tur hi an dang niin an sawi.
Gandhi hian Churachandpur-a relief camp tlawhin, camp-a awmte a kawm bawk. Nimin vek khan Imphal-ah a kir leh nghal a, vawiina a hmun tlawh tumte chu a kal chhunzawm thei dawn em tih engmah sawi lawk theih a ni lo tih Manipur Congress hruaitu Keisham Meghachandra chuan a sawi.
Rahul Gandhi-an Moirang tlawh a tum thu thuneitu lamin an remtih loh avangin ṭhulh a ni bawk. Sorkar lam chuan motor emaw, thlawhtheihna emaw hmangin Moirang a kal hi a phalsak lo a, tualchhung buaina tawk mekte chu Churachandpur-ah chauh hmuh a phalsak niin Meghachandra chuan a sawi bawk.
Police-te'n Gandhi convoy an dansak chu Congress party chuan a sawisel a, party President Mallikarjun Kharge chuan, 'Gandhi hi harsatna tawk, relief camp-a awmte hmu a, an rilru thawi damsak tuma kal a ni. Tun thlengin PM Modi chu Manipur chungchangah a la ṭawng chhuak duh lo a, anmahnia inbuaipui turin a thlauhthla tawp a ni. State leh central-a BJP sorkar chu nasa taka inlulingin, Rahul Gandhi thiltih tumte an dansak a ni," a ti
