NESO-in thil tum ruk neihah sorkar laipui ring

North East Students’ Organization (NESO) chairman, Samuel Jyrwa chuan sorkar laipui chu Manipur-a tualchhung buaina chhuak chungchangah thil tum ruk neiah a puh.

NESO hian Nilaini khan Khyndai Lad, Shillong-ah Manipur pual hian candlelight vigil an buatsaih a, Manipur mipuite tuarna a ṭawmpui tih lantirin, pawl hrang hrang aṭangin mi ṭhahnem tak an kal khawm.

NESO chairman chuan thla hnih hnuah pawh Manipur buaina hi a la reh lo tih sawiin, "Tun thlenga buaina chhuak tihreh a la ni lo hi, sorkar laipui hian thil tum ruk neiin Manipur state chhunga buaina chhuah hi a remtiah kan ngai. Eng nge an thil tum hi kan hre lo a, mahse, pawn lam mite'n hmarchhak tlang mite tana thil pawi tur an ruahman pawh a ni thei. Vawiina kan kal khawm hi Manipur-ah inremna kan duhzia kan lantirna a ni," tiin a sawi.

Manipur sorkar leh sorkar laipui chu buaina an tihreh theih loh vanga sawiselin Jyrwa chuan, "State sorkar leh sorkar laipuite hi buaina tireh tur hian an hlawhchham. President's Rule puang loin sipai 50,000 chuang tirh luh a ni tawh a, an duh tak tak a nih chuan hemi ringawt pawh hian buaina chhuak hi an tireh thei," a ti.

Jywra chuan Manipur chungchangah Prime Minister Narendra Modi a ngawi tlat chu mak a tih thu a sawi a, buaina chhuak tireh tura hma la tur leh ṭawng chhuak turin a ngen.

NESO-in Meitei leh Kuki pawlte an hmuh tur thu pawh sawiin NESO chairman chuan, "He kan inbiakna hian inremna kawng eng emaw tal a thlen kan beisei," tiin a sawi.

Khasi Students' Union (KSU) President Lambokstarwell Marngar pawhin thu sawiin, hmarchhaka hnam leh hnam inkara buaina chhhuak hi tlangmi ni ve lote'n an lo hlawkpui zawk a hlauhthawnawm thu a sawi a ni.