Security force-te'n bomb 250, silai 1,100 leh silai mu 13,941 man

Manipura-a security force hrang hrang; Indian Army, Assam Riffles leh Manipur police-te chuan thla hmasa khan state chhungah a huhoin ralthuam dap runpui an nei a, ralthuam chi hrang hrang ṭhahnem tak an man. Security force-te ralthuam man hi bomb 250, silai 1,110 leh silai mu 13,941 an ni.

Tualchhung buaina a chhuah ṭan tirh khan buainaa inhnamhmawihte chuan ralthuam dah khawmna station hrang hrang aṭangin silai leh silai mu tam tham tak ru chhuakin, May 3 aṭanga ralthuam ruk bo tling khawm hi silai 5,000 leh silai mu nuai 5 chuang a ni tawh. Security force-te chuan ralthuam ruk chhuahte hmuh letna tura hma lain, ralthuam dap runpui hi a huhoin an nei.

Manipur-ah boruak ṭha a awm leh theih nana hma lain, buaina chhuah hlauhthawnawmna hmunah flag march, patrolling leh search operation-te an kalpui bawk. State chhunga hmun hrang hrangah checkpoint 119 siam niin, buaina chhuak thei laka venhim hna an thawk tel.

Hetih lai hian Manipur sorkar leh sorkar laipui chuan Civil Society Organisation (CSO) leh khawtlang hruaitute chu state chungah boruak muanawn a awm leh theihna tura thawhpuiah an sawm. Manipur Chief Minister N Biren Singh chuan inkahhai an puan bawhchhia an awm a nih chuan an chungah na taka action lak a ni ang tih a sawi.