State assembly inthlan neih hmabak, Meghalaya-ah rorellai National People's Party (NPP) MLA Esmatur Momini chuan Nilaini khan speaker Metbah Lyngdoh hnenah banna a thehlut a, Trinamool Congress (TMC) a zawm dawn. Hetih lai hian MLA ṭanglai zinga pathum chuan NPP hi an zawm dawn thung.

Esmatur Mominin hi Phulbari bialtu MLA a ni a, mahse NPP hian assembly inthlan lo awm turah Phulbari bial candidate atana AT Mondol a ruat a ni. Party candidate a chan tak loh avangin Mominin hian NPP a chhuahsan hi rinlawk a ni. NPP MLA aṭanga bang pathumna a ni a, nikum November thla khan Fairlene Sangma leh Benedict Marak-te chuan NPP hi chhuahsanin BJP an lo zawm tawh bawk.

Hetih lai hian People’s Democratic Front (PDF) MLA pahnih leh Hills State People’s Democratic Party (HSPDP) MLA pakhat chuan chief minister Conrad Sangma kaihhruai NPP an zawm dawn thung. Heng party-te hi NPP kaihhruai Meghalaya Democratic Alliance (MDA) sokara tel ve ve an ni. NPP zawm turte hi cabinet minister Hamletson Dohling leh MLA pahnih - Jason Sawkmie Mawlong leh Samlin Malngiang-te an ni. Nikum December thla khan Congress MLA suspend mek pathum, Ampareen Lyngdoh, Mohendro Rapsang leh Kimfa S Marbaniang-te chuan NPP hi an lo zawm tawh bawk. Congress chuan BJP telna, NPP kaihhruai ṭangrual sorkar thlawptu an MLA pangate a suspend a ni.

Dohling chuan a bial chhunga an party hruaitute thurawn anga NPP hi zawm a nih thu sawiin, inthlan lo awm turah a bial ngaiah hian NPP ticket-in a ding dawn a ni.