Manipur tualchhung chanchinbu editor hreng Journalist-ten police-te chetdan an dem

Manipur police-te chuan Nilaini khan tualchhung chanchinbu, Sanaleibak editor Hemantakumar Ningomba chu darkar eng emaw chen an hreng a, mahse a hnuah an chhuah leh nghal.

Police-te hian Ningomba hi local TV channel-a thu sawihona an neihah a thusawi chungchang avangin, Khongman-a a chenna in aṭanga hruaichhuakin hun eng emaw chen an hreng zui a ni.

He thil thleng hi All Manipur Working Journalists Union leh Editors’ Guild, Manipur chuan an dem thu sawiin, police-te chet dan chu thil ṭul lo tak a ni, an ti. Thuchhuah inṭawm siam nghalin,Sanaleibak editor chu journalist zahawm tak a ni a, awmze nei loa police-te a chenna in aṭanga hruaichhuah a, an hren zui chuan a zahawmna leh dinhmun thlengin a nghawng thei a ni, an ti. A lakah thubuai thehluh pawh engmah a awm loh avangin, police officer chuan zahawm takin, office hour chhungin thu sawipui turin a sawm zawk thei reng tiin an tarlang.

State chhunga journalist-te chunga hetiang thil a thlen nawn tawh lohna tura hma la turin state sorkar an phut. A thleng nawn leh a nih chuan journalist pawlte chu a ngawi mai mai tawh dawn lo a, a ṭul dan angin dan hmang pawhin hma an la zui tawh dawn tih an thuchhuahah an sawi bawk.