March-April ah Manipur local body inthlan nei dawn

Manipur sorkar chuan urban leh rural local body inthlan chu March-April thlaah neih a ni dawn tih a puang.

Chief minister N Biren Singh kaihhruaia emergency cabinet meeting neih hnuah, minister Dr Sapam Rajan Singh chuan local body inthlan neih hun tur hi a puang a ni.

March thlaah Imphal Municipal Corporation inthlan neih a ni ang a, April thlaah Panchayati Raj inthlan neih a ni ang. Hill district-a Autonomous District Councils (ADC) inthlan tur erawh chu delimitation tihfel hunah neih a ni thung ang.

Eptu party-te chuan BJP kaihhruai Manipur sorkar chu local body inthlan neih hun tur tihkhawtlaiah an lo puh tawh a, inthlan neih hun tur a tikhawtlai chungchangah insawifiah turin Congress MLA Okram Surjakanta chuan a lo phut tawh a ni.