Manipur chief minister N Biren Singh chuan ruihhlo do hna thawhnaa thawk ṭha, Kangpokpi district police 30-te hnenah lawmman, Rs nuai 10 a pe. Heng police-te hian operation ṭum hnihah ruihhlo, Rs vbc 58.95 hu an man a ni.
CM Biren Singh chuan Kangpokpi district police-te hian May leh June thla khan ruihhlo, heroin kg 4.721 an man tih sawiin, heng ruihhlote hi sahbawn bawm 291-ah thuhruk an ni, a ti.Ruihhlo do hna thawhna kawnga an hnathawh ṭhat vang leh, police hming an tihṭhat avangin state sorkar chuan Kangpolic police-te chu lawmman hi a pe a ni, a ti. District danga police-te pawh an hnathawhnaah a chhuang hle tih sawiin, midangte pawh lawmman pek zel an la ni dawn tih a sawi bawk.
June 10, zan dar 7:30 vel khan Kangpokpi police-te hian National Highway 2-a Kalaphar OP-ah ruihhlo zuar, Thaovikhu MK chu manin, a motor an endiknaah sahbawn bawm 71-a heroin a phurh chu an man a, a ruihhlo phurh hi kg 2.955 a tling. Thu an zawhfiahnaah Churachandpur district mi, Letkhohao Haokip hnen aṭangin ruihhlo hi a la tih a sawi a, police-te hi Churachandpur-ah kal nghalin Haokip chenna in hi an dap zui a, sahbawn bawm 101-a heroin dah, a vaia kg 2.140 chu an man zui leh nghal a ni. He ina ruihhlo an man hi national market-ah Rs nuai 54.30 hu leh, international market-ah Rs vbc 27.15 a ni tih an sawi.
May 9 khan Kongpokpi police-te hian international market-a Rs vbc 31 hua chhut, ruihhlo kg 2.131 an lo man tawh bawk a, he thilah inhnamhnawiha puh mi pathum manin, an zingah hian Manipur police department-a head constable pawh a tel.
