Assam NRC hotuin a thlak tak lakah complaint thehlut

Assam-a National Register of Citizens (NRC) state coornidator, Hitesh Dev Sarma chuan Assam police-a vigilance & anti-corruption wing-ah a thlak tak, Prateek Hajela lakah complaint a theh lut.

Hitesh Dev Sarma hian NRC-ah sum fel tawk lo a awm nia sawiin Hajela lakah hian complaint a thehlut a, FIR erawh ziah luh a ni lo.

Vigilance & Anti-Corruption wing official chuan complaint thehluh hi an zirchiang phawt ang a, bawhzui tlaka an ngaih chuan a ṭul angin hma an la zui dawn tih a sawi.

Sarma-a'n complaint a thehlutah hian Assam-a NRC final list buatsaih lai vel khan sum lamah thil fel tawk lo a awm niin a sawi. Thla hmasa khan Hajela lakah hian CID-ah complaint a lo thehlut tawh bawk. Hajela leh officer eng emaw zat bakah,data entry operator-te chu citizenship document an dah luhnaah ram duhdan kalh zawng leh, thil dik tawk loa ti ah a puh a ni.

Kum 2019, August 31 khan NRC final list hi tihchhuah a ni a, list-ah hian hming 3,11,21,004 dah niin, diltu zinga mi 19,06,657 hming telh a ni lo.