Tripura-a by-election neihna turah venhimna uluk

Tripura police-te chuan June 23-a assembly by-election neihna tur, assembly constituency pali huam chhungah venhimna khauh zawkin an kalpui.

Police-te chuan by-election neihna turah hian flying squad leh static surveillance team-te dah an ni tawh tih an sawi. Inthlan vuakveta buaina chhuah palh venna atan leh, dan leh thupek kenkawhna atan venhim hna hi uluk zawka kalpui a nih thu an sawi.

Constituency paliah hian central armed police force (CAPF) company 20 leh Tripura State Rifles (TSR) company panga dah an ni a,Yubrajnagar bialah buaina tenau a chhuak tih loh chu inthlan neihna tur hmunahte hian buaina lian tham chhuak a la awm lo tih an sawi bawk.

By-electoin hi Agaratala, Town Bordowali, Surma leh Yubrajnagar bialah neih a ni dawn a, Tripura chief minister nilai Manik Saha pawhin Town Bordowal bialah a chuh a ni. May 15-a CM thar atan lakluh, Saha hi MLA a nih loh avangin lakluh a nih aṭanga thla ruk chhung ngeia Assembly member atana thlan tlin a ngai a ni. Saha chuan inthlanah hian a chak ngei tur thu leh, vote tla aṭanga 95% a hmuh phak tur thu a sawi.

Nakkuma assembly inthlan nei tur, Tripura-a by-election neih tur atan hian party hrang hrang pawh an campaign ngawrh hle. Hetih lai hian party-te hi model code of conduct bawhchhiaah an inpuh fo bawk.

Seat palia inthlan neih turah hian candidate 22 an awm a, vote nei 1,88,854 an awm. Vote tlate hi June 26-ah chhiarin result puan nghal a ni ang.