Manipur assembly inthlan neih tura Congerss party candidate-te chuan Ningani khan an party-a rinawmna thu tiamin, thlan tlin an nih pawhin eng kawng mahin Congress party an chhuahsan lo ang tih an tiam.

Candidate-te rinawmna thu tiam hi Imphal-a Kangla Fort-ah neih a ni a, AICC Manipur in-charge Bhatka Charan Das-a'n thu hi a tiam tir a ni.

Congress party candidate-te chuan party dan leh dunte an zawm zel tur thu leh, mipuite duhdan an zah sak tur thute an tiam. Thu tiam an lak zawh hian candidate leh party hruaitute chu sakhaw hmun pawimawh hrang hrangah kalin, malsawmna an dil a ni. Rinawmna thu tiamtute zingah hian chief minister hlui O Ibobi Singh leh CWC member Gaikhangam pawh an tel.

Assembly seat 60-a inthlan neih tura Congress party hian candidate tur mi 50 hming a puang tawh.

Kum 2017 assembly inthlanah khan Congress hi party mala seat la hnem ber niin seat 60 awmah seat 28 a la pha a ni. Mahse an party MLA eng emaw zat hi uirein, BJP an zawm a, an zingah hian CM hlui O Ibobi Singh tupa, Okram Henry pawh a tel a ni.

Manipur Pradesh Congress Committee (MPCC) thupuangtu leh MLA, K Meghachandra chuan an state mai bakah state dangah pawh mipuite an aiawh tura MLA atana an thlan tlin zinga tam takin an awmna party uire sanin, party dang an zawm fo tih a sawi. Hei vang hian hetiang thil a thlen tawh lohna tura party-a rinawmna thu tiam lak hi a ṭul a ni tiin, hei hi democracy humhimna nena inzawm vek a ni, a ti.

Manipur assembly inthlan hi thawh hniha neih a ni dawn a, February 27 leh March 3-ah vote thlak a ni ang. Inthlan thawh khatna hi assembly constituency 38-ah neih a ni dawn a, hemi atan hian February 1 aṭang khan nomination thehluh hun hawn a ni. Inthlan thawh hnihna atana hriattirna chu nimin khan tihchhuah a ni bawk.