Tripura CM-in Kamalpur border haat lungphum a phum

Tripura chief minister Biplab Kumar Deb chuan Ningani khan Dhalai district-a Kamalpur border haat dinna tur lungphum a phum. He hun hi Bangladesh commerce minister Tipu Munshi pawhin a hmanpui a ni.

Ramri bazar hi India leh Bangladesh ram china square meter 75 huam chin ve veah siam a ni dawn a, a inep hian vendor 100 ve ve awm tura ruahman a ni bawk tih Dhalai district magistrate Govekar M Ratilal chuan a sawi. He bazar siamna tur atan hian Rs vbc 3.50 hu Detailed Project Report (DPR) pawh siam a ni tawh a, ramria bazar siam thar hian ram pahnihte insumdawn tawnna pawh a tihlen phah hle dawn a ni.

DM chuan thla 12-18 hnuah border haat hi hawn theih an beisei thu sawiin, a siamna tura senso hi sorkar laipui lam tum vek tur a ni tih a sawi.

Tripura-ah hian border haat hi pahnih a awm mek a, South Tripura district-a Srinagar leh Sepahijala district-a Kamalasagar-te an awm tawh a ni. North Tripura district-a Raghna-ah border haat dang siambelh tum a ni bawk.