Thingtlang biala chengte, an inchhung ngeia tap water connection pek an nihna tur, Jal Jeevan Mission hnuaiah sorkar laipui chuan hmarchhak state pariatte tan cheng vaibelchhe 1,605 a pe chhuak tih ministry of Jal Shakti chuan a tarlang.

Hei hi financial year kal meka he mission hnuaiah ṭum li sum pek chhuah tura a hmasa ber a ni. Financial year 2021-22 chhung atan Jal Jeevan Mission hnuaia hmarchhak state pariatte tana central grant dah hi Rs vbc 9,262 a ni.

Ministry of Jal Shakti chuan ramin hun harsa tak a tawn mek karah rural area-a tap water connection pekna tura sorkar laipuiin sum a pek chhuah chuan hmarchhak bial economy pawh hma a sawntir phah ngei an beisei tih a sawi.

Jal Jeevan Mission hnuaiah central fund pek zinga 93% hi water supply infrastructure tihchangtlunna atana hman tur a ni a, 5% chu a kaihhnawih mamawh dang atana tih niin, 2% chu tui quality enfiahna atana tih a ni.

Hmarchhak state-a rural area-ah hian chenna in nuai 90 vel a awm a, Assam-ah tam berin nuai 63.35 an awm. Financial year hmasaah khan chenna in nuai 11 hnenah tap water connection hi pek an lo ni tawh.

Minister chuan kum 2019, August thlaa prime minister Narendra Modi-a'n Jal Jeevan Mission a puan tirh khan, hmarchhak biala rural area-ah chhungkaw nuai 3.2 (3%) chauhin tap water connection hi an la nei a, mahse tunah chuan chhungkaw nuai 16.27 (18%) in connection hi an nei tawh a ni, a ti.

Sorkar laipuiin fund a pekchhuah aṭang hian Arunachal Pradesh chuan Rs vbc 253.83 a dawng a, Assam-in Rs vbc 700, Manipur-in Rs vbc 120.30, Meghalaya-in Rs vbc 169.60, Mizoram-in Rs vbc 75.97, Nagaland-in Rs vbc 111.20, Sikkim-in Rs vbc 31.20 leh Tripura-in Rs vbc 142.91 an dawng tih ministry chuan a tarlang bawk.

Jal Jeevan Mission hnuaiah hian kum 2024-ah chuan ram chhunga rural area-a cheng in tinte hnena tap water supply hi pek hman tum a ni.