Assam CM-in district hrang hrang tan 'Guardian Minister' a ruat

Assam chief minister Himanta Biswa Sarma chuan state chhunga dis­trict 34-te tan 'Guardian Minister' 13 a ruat.

Nilaini khan CM hoin cabinet meeting neih a ni a, meeting zawh hnuah CM hian Guardian Minister-te hi a ruat a ni a, minister-te hian district 2-3 ṭheuh an chang a ni.

Guardian Minister-te hian an district chan­pual tur siamsakin, mawhphurhna pek a ni. District chhunga sorkar laipui leh state sorkar policy hrang hrang kalpui a nih dan te, hmasawnna hna thawh a nih dan te, rorelna kawnga siamṭhat ngaite leh mipuite tana welfare scheme siam chungchangte enpuiin, Chief Minister hnenah report an pe dawn a ni. An report-ah hian scheme leh policy kalpuina kawnga harsatna awm te, heng harsatna sutkian a nih theih dan turte pawh an thehlut tel a ngai bawk.

Guardian Minister-te hian an district chan ṭheuh­ah infrastruc­ture lam tihhmasawn­na tur ruahmanna te an siam dawn a, ṭhalai tana hna tam zawk siam a nih theih dan kawngte an ngaihtuah bawk ang. Minister-te hian an district chan ṭheuh headquarters chu thla tin emaw, thla hnih danah emaw tal an tlawh ṭhin tur a ni. Hei bakah hian emergency a awm chuan a theih anga tam tlawh tura tih an ni.

CM chuan district 34-ten hmasawnna chak zawk leh rualkhai tak an neih theihna atana he ruahmanna hi siam a ni. District thuneitute leh department dangte berawnin minister-te hian 'Vision Document' an siam dawn a, district hmasawnna tura hma­thlir neihte tarlangin, budget siamah pawh an district tan eng nge ngaih pawimawh zual ngai tihte an sawi dawn a ni.