Assam-ah ni khatah hripui vangin mi 90 thi

Assam state-ah Nilaini khan Covid-19 hri avangin mi 90 an thi a, an state-a hripui vanga thi hi mi 3,005 an tling tawh.

Hemi ni vek hian hri kai thar mi 5,699 awm belhin, hrikai hmuh chhuah tawh hi 3,86,870 an tling tawh a, active case hi 52,884 an awm mek. Mi 3,29,634 enkawl dam ni tawhin recovery rate hi 85.21% a ni.

Liquid medical oxygen (LMO) metric ton 80 phurtu Oxygen Express train chu a vawi hnihna atan Nilain khan Assam-a Inland Container Depot, Amingaon-ah a thleng leh. He rel hi May 25 khan Tata Nagar, Jharkhand aṭanga rawn chhuakin darkar 9 chhungin km 630-a thui a rawn tlan a ni. May 23 khan Oxygen Express train hmang hian a ṭum khatna atan LMO MT 80 chu Assam-ah hian phurh thlen a lo ni tawh bawk.

Indian Railways chuan hri kaite enkawlna atana mamawh, oxygen phurtu rel tlanna tur hian green corridor ruahmanin, Oxygen Express train te hi chak leh him zawkin an tlan theih phah a ni. State-te chu an theih anga puih zel an tum thu sawiin, LMO hi tanker 1,080 chuang hmangin state hrang hrangah MT 17,945 an phur thleng tawh a ni.