Manipur CM-in Churachandpur-a PSA oxygen plant hawng
Manipur chief minister N Biren Singh chuan Nilaini khan Churachandpur district-a Pressure Swing Adsorption (PSA) oxygen plant siam thar chu a hawng.
CM Biren Singh chuan PSA oxygen plant hawn thar aṭang hian ni khatah D-type oxygen cylinder 40-50 thleng siam chhuah theih a ni dawn tih a sawi. "Ni ruk liamta khan he plant hi kar khat chhunga hman theih tura peihfel kan lo tiam tawh a, kan tiam ang ngeiin kan hawng thei ta a ni," a ti. Hun reilote chhunga peih fel a nih theihna atan beitu, cabinet minister, MLA leh official-te chungah lawmthu a sawi.
Covid-19 hri kai an pun belh zel avang leh, hri kai enkawlna atana oxygen mamawh a san zel avangin Thoubal district-ah pawh PSA oxygen plant hi siam mek a ni bawk.
Manipur-ah hian Nilaini khan hri kai thar tam ber ni a ni leh a, mi 847 in hri an kai thar a, hripui vangin mi 10 an thi bawk. Manipur-ah hian Covid-19 vanga thi hi mi 730 an tling tawh a, hri kai mek 7,243 awmin state recovery rate hi 82.77% a ni.