All Tribal Students’ Union Manipur (ATSUM) chuan November 5 aṭangin darkar 48 awh bandh huaihawt an tum tih sawiin, state chhunga national project thawh mekte pawh dan vek an tum tih an sawi.
ATSUM hian hills area-a Autonomous District Councils (ADCs) inthlan chu ruahman lawk anga kalpui phutin bandh an lo huaihawt tawh a, mahse October 25 khan sorkar nen inbiain inremna an siam avangin an nawrh hi an titawp lailawk a ni.
ADC inthlan buatsaih chungchanga sorkar nena inremna an siam hnuah, sorkarin hma a lak chhunzawm leh tak loh avangin November 5 aṭangin inthlan phuta nawrh huaihawt chu an chhunzawm leh dawn tih ATSUM president Seiboi Haokip chuan a sawi.
Bandh huaihawt chhung hian emergency leh essential service-te erawh ngaihhnathiam an ni dawn tih a sawi bawk.
Manipur-ah hian hill district 10 a awm a, heng zinga panga chu siam thar an ni. Hill district zawng zawng hi ADC paruk - Churachandpur, Chandel, Ukhrul, Senapati, Tamenglong leh Sadar Hills huam chhungah an awm.
ADC term hi May thla khan a zo tawh a, mahse hri leng avangin state sorkar chuan thla ruk dang pawtseiin, October-November chhunga inthlan neih turin a ti a ni. Mahse inthlan buatsaih tum hian sorkar chuan hma a la zui lo tih ATSUM chuan an sawi a ni. Hei hi duh loin, term an pawhsei November thla ral hma ngeiin inthlan hi buatsaih turin an phut a ni.
