Supreme Court-in Assam leh Nagaland-te 'last chance' a pe

Supreme Court chuan Thawh­ṭanni khan Assam leh Nagaland-a Assembly leh Parliamentary con­stituency siamṭhat tur chung changah state pahnihte chu insawifiahna  thehlut turin 'last chance' pek an ni tih a hrilh a, hemi rual hian sorkar laipui pawh hriattirna hi a pe tel nghal  bawk. 

Chief Justice of India SA Bobde kaihhruai bench, justice AS Bopanna leh V Ramasubramanian chuan delimitation kalpui mek titawp rih tura petition thehluh chungchang ngaihtuahin, state pahnih leh sorkar laipui chu an chhanna thehlut turin a hriattir a ni. 

Petition thehluttute hian sorkar hnenah hian notice hi a hmain pek lo ni tawh mah se, tun thlengin chhanna an la pe lo a, hetichung hian delimitation exercise hi kalpui chhunzawm reng a ni tho niin an sawi. 

Chief justice chuan he hmalakna kalpui mek hi sorkar laipui leh state pahnihte hian chhanna an pek phawt loh chuan 'stay' mai theih a ni lo tih sawiin, hei vang hian chhanna thehlut turin 'last chance' pek leh an ni, a ti. Kar  hnih chhunga chhanna an pek loh chuan court chuan a duh dan angin a kalpui tur thu a sawi bawk.