Assam NRC state coordinator Prateek Hajela chuan Supreme Court hnena report a thehluhah list-a hming ziahluh ṭhat tum te zinga “list A” document 15 awm zinga 10 chiah pawm tura a rawtna chuan political party-te leh civil society organisation-te a tithinur hle.
Hajela-an document panga telh loh tura a tih te hi 1951 NRC leh March 24, 1971 thlenga voter list, citizenship certificate, refugee registration certificatesleh ration card pekchhuah te an ni.
Congress hruaitu leh state Aseembly-a opposition leader Debabrata Saikia chuan Hajela chu Supreme Court a ni lo zawnga kaihruaiah a puh a, ban nghal turin a duh thu a sawi bawk. Saikia chuan Hajela rawtna chu a pawm theih loh thu sawiin 1951 NRC leh 1971 voter list-a tel thlah kalzel, document dang nei si lo te chu NRC-ah hian an tel thei dawn lo tih sawiin document panga chu pawm a nih loh chuan India mi, mi tam tak chu NRC-ah an tel dawn lo a ni, a ti.
MP leh perfume baron Badruddin Ajmal kaihhruai All India United Democratic Front (AIUDF) pawhin NRC kalpui mek chu Citizenship Act Section 6(A) leh Citizenship Rule 2003 Schedule 4(A) hnuaia kalpui niin heng section-ah hian 1951 NRC leh 1971 voter list a tel thu sawiin heng doncument te hi pawm a nih leh si loh chuan NRC chuan awmzia a nei dawn lo tih a sawi.
Assam chhunga CSO, a bik takin Barak Valley-a Bengali ṭawng hmang te chuan Hajela rawtna hi an dodal nasa hle a, dan kalh a nih thu leh NRC kalphung kalh a nih thu an sawi bawk.
Citizen’s Rights Protection Committee secretary general Sadhan Purkayastha pawhin NRC official rawtna siam chu a pawm loh thu a sawi bawk a ni.
Assam NRC draft list June 30-a tihchhuahah khan mi nuai 40 chuang zet an tel lo a ni.
