Assam: Sentut danna lak hnuah zirlai 25 dam lo

Assam Hailakandi district official te chuan Inrinni khan an district chhunga zirlai 25 vel chuan sentut danna an lak zawh hnu lawkah khawsik, pumna leh luakchhuak an neih thu an sawi.

Hailakandi Deputy Commissioner Adil Khan chuan Katlicherra revenue circle huamchhunga awm Sahabad ME Madrasa school naupangte chu mid-day meal an ei zawh hnu lawkah measles rubella (MR) pek an nih thu sawiin, damdawi an lak hnu lawkah hian khawsik, pumna leh luakchhuak an neih thu a sawi a ni.

Zirlaite hi Katlicherra Block Public Health Centre-ah enkawl nghal niin an dinhmun erawh ngaihtuahawm lutuk an ni lo niin official-te chuan an sawi.

Joint Director, Health Services, Avijit Basu chuan mi paruk chu damdawi-inah dahluh an nih thu a sawi a, midang pawh uluk taka enfiah an nih thu a sawi.

Deputy Commissioner Adil Khan chuan he thil thleng hi chhuizui turin thupek a tichhuak a, joint director of health services leh district immunisation officer-te chu hma la turin a hriattir a ni. Khan chuan a rang thei ang bera report thehlut turin a ti bawk.

Basu chuan zirlai dang 120 erawh chu an dinhmun a ṭha tih sawiin, District Immunisation Officer (DIO) K Thambalsena chuan thil pawi lutuk engmah a awm loh thu a sawi ve thung.