Kolkata leh Delhi-ah Manipur hel man
Kolkata leh Delhi-ah Inrinni khan Manipur hel pakhat ve ve an man a, Kangleipak Communist Party (KCP) mi ve ve nia tarlan a ni.
Kolkata Police Special Task Force-te chuan Pathianni-a thuchhuah an siamah Inrinni khan Manipuri hel pakhat an man thu an sawi a, an mi man kut aṭang hian ralthuam leh silai mu an man thu an sawi.
Kolkata police-te chuan an mi man hi Amon Nelson Singh(28) a nih thu an sawi a, Kangleipak Communist Party (KCP) chairperson nia inchhal a nih thu an sawi a ni. A kut aṭang hian 9mm pistol pakhat, 7mm pistol pahnih leh silai mu round thum an man bawk niin police-te chuan an sawi. Police-te chuan pawikhawihna hrang hrangah a inhnamhnawih tih a inpuan thu an sawi a, city jewellery shop aṭanga bungraw ruknaah pawh a inhnamhnawih tih an sawi bawk.
Inrinni vek khan Delhi Police Special Cell-te chuan Kangleipak Communist Party (KCP) mi tho an man bawk a, police-te chuan an mi man hi pawikhawihna hrang hrangah a inhnamhnawih tih an sawi.
Delhi Police-te chuan an mi man hi Moirangthem Rana Pratap a nih thu sawiin an pawlah General Secretary a nih thu an sawi a, Bishnupur area-ah an man tih an sawi bawk.