Supreme Court chuan Thawhlehni khan thuchhuah siamin Assam National Register of Citizens (NRC) list-a tel lo te lakah hleihlenna lantir a nih dawn loh thu leh hetiang zawnga hmala tu tur thuneihna nei an awm loh thu sorkar laipui a hrilh.
Court chuan NRC list siam kalpuina chu a dikin a rintlak tur a ni a ti bawk.
SC chuan sorkar laipui hnenah list-a tel lo ten insawifiahna leh lungawi lohna an thlen turte lo chingfel thei tura ṭha taka inbuatsaih turin a hriattir a ni.
Assam NRC draft list hi Thawhṭanni khan tihchhuah a ni tawh a, mi vaibelchhe 3.29 awm zinga 2.9 chu list-ah hian an tel a, mi nuai 40 chuang an tel lo thung.
Hemi chungchang hi BJP President Amit Shah chuan a hma in Congress beih nan a lo hmang tawh a, Assam Accord 1985 ziah a nih lai khan khatih hunlaia prime minister Rajiv Gandhi khan NRC hi a kalpui ngam lo niin a lo puh tawh a ni.
NRC draft list-a tel lo mi tam tak chuan nasa takin an sawisel nghal a, Samajwadi Party MP Jaya Bachchan kaihhruainain Parliamentary complex-ah NRC list dodalna hi Thawhlehni khan an lantir nghal a, he hunah hian Parliament member dangte pawh an tel nual a ni.
NRC duh loa pungkhawm te hian placard-te kengin mahni ram ngeia raltan an nih chhanah zawhna te an siam a ni.
Local Register of Citizens Registers (LRCR) chuan NRC draft list-ah hian hmeichhe tel lo an tam zawk niin an tarlang.
Union Home Minister Rajnath Singh chuan NRC draft list-a tel lo te chiai lo turin leh khua leh tui an ni ngei tih finfiahna hun pek an ni dawn tih a sawi thung.
West Bengal chief minister Mamata Banerjee-i ve thung chuan NRC list chu nasa taka sawiselin Assam aṭanga Bengali-te umchhuahna tur a nih thu a sawi ve thung a, NRC update chuan thisen chhuahna leh civil war a thlen thei tih a sawi ve bawk.
