KHADC bill India in a pawm loh chuan, India kan chhuahsan ang: Shylla

Meghalaya-a Khasi Autonomous District Councils (KHADC) chief executive member HS Shylla chuan Khasi Hills Autonomous District (Khasi Social Custom of Lineage) (Second Amendment) Bill, 2018 chu India in a pawmpui loh chuan India ram an chhuahsan tur thu a sawi.

CEM Shylla hian Thawhṭanni khan KHADC bill chungchangah hian Deputy Chief Minister Prestone Tynsong chu a hmu a, Shylla chuan bill zir­chiang a, governor hnena pawmpuina la tura thawn chu sorkar hna a nih thu a sawi a ni.

Tynsong chuan governor in bill hi sorkar rawn loa a pawmsak a nih pawhin sawi theih an neih lo thu a sawi. KHADC chuan an council chhungah chuan dan siamṭhat theihna an nei a ni, a ti.

CEM Shylla chuan me­dia hmaa thu a sawinaah hmeichhe ṭhenkhat bill dodal tute chuan an hma an sial vang mai a nih thu a sawi.

Tribal hmeichhia-te chuan he bill-ah hian lungawi lohna an nei loh tih sawiin, tribal ni lo pasal neih duhte chauhin bill chu a dik lo tih an sawi a ni, a ti. Hmeichhia te chu hnam dang pasal nei tura an dan loh thu sawiin, Khasi 90% in an duh chu a tlem zawkin an dodal tur a ni lo tih a sawi bawk.

Shylla chuan Khasi-Pnar community-ah public meeting an koh dawn thu a sawi a, India sorkar, Supreme Court emaw India hrim hrim in an pawmpui emaw pawmpui lo emaw, Khasi community chuan a kaltlangpui dawn a ni, a ti. Khasi te chuan an nihna venghim turin dikna chanvo an neih thu sawiin India ram chuan a ṭul lo a ti a nih chuan an chhuahsan mai tur thu a sawi a ni.