Manipur Congress MLA inah pistol bo hmuchhuak

Manipur Director General of Police (DGP) pool aṭanga ralthuam bo nia report awm chhuina kalzelah Thawhṭanni khan National Investigation Agency chuan Congress MLA inah heng ralthuam bo zinga eng emaw zat hi an hmuchhuak.

NIA thupuangtu in Thawhlehnia thuchhuah an siamah Thawhlehni khan NIA-te chuan Saikul MLA Yamthong Haokip-a chenna in, Imphal East district-a Mantrepukhi an dapnaah pawisa cheng nuai 26.40, rangkachak aṭanga thil siam cheng nuai 20 man hu, Beretta pistol, US siam Tomcat-32 pistol leh magazine, licensed awm lo pistol, silai pahnih, silai mu round 45 bakah 9mm pistol( DG pool aṭanga bo)-te an hmuchhuah thu an sawi.

September 2016 leh 2017 kumtir velah khan DG pool ‘kote’ (armoury), Manipur Rifles hmun aṭangin pistol 56 leh magazine 58 a bo tih hriatchhuah a ni a, NIA-te hian hemi chhuizui hna hi an kalpui nghal a ni.

He case kalzelah hian tun thlengin mi pakua man an ni tawh a, pistol bo 56 zinga pathum chu hmuchhuah an ni leh tawh a ni. NIA thupuangtu chuan heng pistol an hmuhlet tawh te hi hel pawl hrang hrang pali kut aṭanga an hmuhlet a nih thu a sawi.