Myanmar-ah Nilaini zan khan lir a nghing a, hei hian hmar-chhak bial pawh a nghawng na hle.
Lirnghing nat zawng hi U.S. Geological Survey (USGS)-in a tarlan dan chuan magnitude 6.9-a a ni a, Myanmar-a lei hnuai km 134.8-a thuk aṭanga inṭan a ni. Nagaland State Disaster Management Authority (NSDMA) chuan an state a sawi na hle niin a sawi a, thi leh hliam na lutuk report an awm lo. Indo-Asian News Service, (IANS) report-in a tarlan dan chuan lirnghing hian hmarchhak a sawi na hle a, India ram state dang West Bengal, Bihar leh Jharkhand te pawh lirnghing hian a sawi tel.
Manipur-ah chuan lirnghing vang hian mi parukin hliam an tuar a, mipui hlau thlabar chu kawngpui leh kawtthler remchang laiah te taksa himna zawngin an tlan khawm.
April 10 khan magnitude 7.1-a nain Pakistan, Afghanistan leh Tajikistan inrina velah a lir a lo nghing tawh a, hei hian India pawh a sawi tel a ni. Kumin January 4 khan magnitude 6.7-a nain hmarchhak leh ṭhenawm ram Myanmar leh Bangladesh a lo sawi tawh bawk. He mi ṭum hian Manipur-ah chuan mi eng emaw zatin nunna an lo chan phah tawh a ni. Thla tam pawh a liam hmain lirnghing chuan hmarchhak a nuai ve leh a, hmun hrang hrangah building chhia, thing tlu bakah chhiatna tenau a thlen nual bawk.
Arunachal Pradesh-ah chuan lirnghing vang hian hliam 16 an awm a, hliam hi an pun belh mai theih thu an sawi. Report-in a tarlan dan chuan,hliam tuarte hi hlauh avanga buai phili, pawna tlan chhuak an ni a, hliam zinga pathum te chu Tomo Riba state hospital-ah dahluh an ni a, RKM Hospital-ah pasarih dah an ni bakah midang hliam te chu Heema hospital leh Niba clinic-ah te enkawl an ni. Hliam na lutuk an awm lo a, damdawi inah hian first aid pek an nih hnuah an chhuak leh hlawm a ni. Kra-Daadi, Kurung Kumey leh Dibang Valley-ah te chhiatna a thleng nual a, in chhia eng emaw zat a awm. Chief Minister Kalikho Pul chuan Tomo Riba State Hospital-ah dahluh te hi a hmunah kalin a kan.
DC Sandeep Kumar Singh chuan lirnghing hriat a nih ve leh National Disaster Response Force te chu an che chhuak nghal a, chhiatna thlenna hmun te an pan nghal tih a sawi.
Lirnghing vang hian motor a inhnawh tawt nasa hle a, che sawn ngam loin kawngpuiah ding tam tak an awm bawk avangin hun rei vak lo chhung chu an buai phah hle. Chief Minister office chuan chhiatna thlenna hmun report an dawn te chu endik nghal zel a, thi an awm hriat a la ni lo. Thil thleng hi ministry of home affairs hriattir nghal a ni, a ti bawk.
