LAEF hruaitu kah hlum a ni

Meghalaya police te leh Liberation of Achik Elite Force (LAEF) helte chu Nilaini khan nasa takin an inkap a, LAEF Commander-in-Chief (C-in-C), Augustine Marak chu kah hlum a ni.

East Garo Hills-a Rongjeng Police Station huam chhunga Chichra-ah inkahna hi a thleng a, hel hruaitu hi kah hlum a ni ta a ni.

Police te hian Augus-tine Marak an kahhlum bakah Walsrang N Arengh chu an man a, Rongjeng Police Station-ah dah nghal a ni. Inspector General of Police (IGP) (Operations), GHP Raju chuan, "LAEF te hi 10-12 vel an ni a, minute 45 chhung vel kan inkah hnuah an hruaitu Augustine Marak chu kan kap hlum ta a ni" a ti. Hel te hian AK rifle, magazine leh silai mu ṭhahnem tak bakah, mobile phone leh SIM card pathum an inkahna hmunah hian an kalsan a ni.

Augustine Marak-a ruang hi Williamnagar Civil hospital-ah post mortem tura lak a ni. Augustine leh a hote hian mi kidnap an ching hle a, tun hnai khan PMGSY manager chu Songsak-ah an kidnap. LAEF te hian Assam leh Dimapur-ah te National Socialist Council of Nagaland te nen training an nei ṭhin nia hriat a ni a, Myanmar velah an khawsa nasa hle bawk niin an sawi.

LAEF dintu zinga mi Peter Marak chu police ten an lo kaphlum tawh a, an hruaitu pakhat Sohan D Shira chu Peter Marak kahhlum a nih hnu hian police kutah a lo inpe tawh bawk. Meghalaya sorkar chuan Central Security Force puihna in hel dap chhuah hna hi rei tak chu a lo kalpui tawh a, chhunzawm zel a la ni.