Manipur CM-in a minister pathum a ban

Manipura Chief Minister O Ibobi Singh-a kaihhruai sorkar chuan Thawhlehni khan cabinet minister pathum a ban.

Manipurah hian cabinet siksawi tumna avangin tun hnai hian Congress party chhungah buaina a chhuak a, party hruaitu eng emaw zat chuan an party an chhuah san tawh. Chief Minister O Ibobi Singh hian cabinet minister 12 a nei a, chu chu siam rem a, siksawi a tum. Mahse hei hi chu minister te chuan duh loin an party chhungah hian buaina a inṭan. Minister te hian CM thil tihdan chu an thlawp lo a, an zinga ban an awm a nih chuan an vaia an ban tur thu an lo sawi tawh nghe nghe.

Forest minister Th Devendro, Health minister Phungzathang Tonsing leh Rural Development and Panchayati Raj minister Francis Ngajokpa te chu Thawhlehni khan minister an nihna hlih sak an ni ta a ni. Hetih lai hian minister dang Kshetrimayum Biren Singh, T Manga Vaiphei leh D Korungthang te chu heng mi pathum thlak tur hian council of minister-ah lakluh an ni.

Minister thar pathum te lakluhna inkhawm chu Thawhlehni khan Raj Bhawan-ah neih a ni a, Governor VS Shanmuganathan chuan rinawmna thu tiam tirin a la lut. Lakluh inkhawmah hian state Chief Minister Okram Ibobi Singh, Deputy Chief Minister Gaikhangam, MPCC president TN Haokip bakah senior minister leh MLA ten an telpui a ni.

Okram Ibobi Singh chuan, All India Congress Committee (AICC) aṭangin minister te siksawi tur hian rawtna a awm niin a sawi a, chu chu hriain senior minister pathum te chuan banna an thehlut a ni, a ti. CM chuan Congress party chu chhungkaw lian tak a ni a, minister bang ta te hi an party chakna an ni ṭhin a, minister naupang zawkte tan advisor hna an thawk dawn a ni, a ti bawk. Hetih lai hian minister dang te hian ministry siksawi chung-changah hian thawm an la nei lo.