Disney leh Marvel kutchhuak Captain America: Brave New World chu, tih chhuah a nih aṭangin a zawna a kar thumna turin North American box office-ah No 1 a nih chhunzawm. Captain America franchies movie thar hian beisei pha lo mah se a aia che ṭha an la awm rih lo. Marvel Cinematic Universe movie chhuak tawh zingah che chhe ber pathumna a ni a, mahse kar liam ta chhungin North America-ah a sum lak luh zat khum thei an la awm lo.
'Captain America: Brave New World' hian kar hmasa khan USD mtd 15 lak luh belhin, North America bika a sum lak luh tawh zawng zawng hi USD mtd 164 a tling tawh a, khawvel huapa a sum lak luh hi USD mtd 341.8 a tling tawh bawk. 'Brave New World' siamna atan hian USD mtd 180 vel an seng nia sawi a ni a, hei hian marketing lam a la huam tel lo thung. Hengte nen hian he film siamna atana sum sen hi USD mtd 300 dawn a tling niin an chhut. Hetih lai hian MCU film zingah sum la lut tlem ber la ni. Captain America franchise-a sum la lut tam ber chu 'Captain America : Civil War' kha niin khawvel pumah a sum lak luh hi USD tld 1.1 a tling a ni.
Tlangzarh thar 'Last Breath' chu No 2-ah awmin he film hi Alex Parkinson direct a ni, theater-ah che ṭha nghalin tih chhuah kar hian USD mtd 7.9 a la lut nghal. 'Last Breath' hi survival thriller film niin Woody Harrelson, Simu Liu, Finn Cole leh Cliff Curtis te an chang. A entuten grade an pekah 'B+' a hmu. 'The Monkey' chu No 3-ah awmin, kar hmasa chhung khan USD mtd 6.4 la lut lehin a sum lakluh tawh zawng zawng hi USD mtd 25 a ni tawh. Pahnihna pawh lo ni tawh 'Paddington in Peru' chu USD mtd 4.5 la lut in palinaah a awm. Panganaah hian No 1 dinhmun pawh lo hauh tawh, 'Dog Man' awmin USD mtd 4.3 a lak luh belh leh bawk.
