Lersia Play-in October, 2024 thla chhunga film a pek chhuah zinga leitu ngah ber chu 'Pu Nunga Colony' a ni.

'Pu Nunga Colony' hi In-House Production film pasarihna ani a, October 4, 2024-a tlangzarh a ni. Director hi Drew Pachuau niin, Samuel Pachuau chu script writer a ni. In-House movie siam zingah a hautak ber niin, a budget hi Rs nuai 15 a tling. Mizo lemchan thiam kan neih ṭhat, Papuia Pachuau, Sangsangi, Rosangpuii (Rspi), Tommy leh Francis Malsawma te an chang a, Fela Ralte (Rala Kone) pawh a inlan bawk. 'Pu Nunga Colony' hi series niin, paliah ṭhen a ni a,series khat hi darkar khat awh zel a ni.

Fiamthu film lama hriat hlawh, Mastea leh a pawlte, Rinkson Squad movie, 'Thangfenpa Bawp (Thuruk Thuhruk)' chu October thla chhunga film hralh chhuah tam pahnihna a ni. September 16, 2024-a tlangzarh kha niin, Rinkson squad movie pangana a ni. He film hi 'The Adventure of Lalnuna leh Lalmuana' movie puitling hnuhnung ber tur a ni. Mastea leh Bt-a ten an role ngai an rawn play leh a, anni bakah Hmunmawia, Vanlalpeki, Ramhluna leh Engzuali te an rawn lang leh bawk.

Zote Entertainment kut chhuak, 'Lerlawri' chu pathumna niin, he film hi Mike bawkin a direct a ni a, script hi Tei Zote leh Mike ziah a ni. Ruthy Chenkual, Hriatpuia Kion, Joel Pachuau, Machhungi leh Partei (Lerlawri) bakah VL Hmuaka te an chang.

October thla chhunga Lersia Play aṭanga film hralh chhuah hnem panga zingah hian 'Million Dollar Boy' leh 'Saii' pawh an lang a ni.