Ṭhazual Award 2024: Perform turte an hriat ta

Ṭhazual Award vawi 10-na chu November 7 leh 8 hian neih a ni leh dawn a, perform turte pawh puan an ni ta. Artist ṭha ber berte chetla kan hmu leh thei dawn e.

Ṭhazual Award hi Gospel zan leh Lengzem zanah ṭhen a ni leh dawn a, November 7-ah Gospel zan hmangin, November 8-ah Lengzem zan hman a ni ang.

October 16, 2024 khan nomination pawh puan ni tawhin, category 16 a awm a, Gospel leh Lengzem-ah ṭhen a ni. Band of the Year ah chuan huang khatah dah an ni thung.

Ṭhazual Award 2024 hian pawl tih bik nei loin, November 2023 aṭanga October, 2024 inkara music video ti chhuak Mizo zaithiamte a huam a ni.

November 8, 2024 zana Thazual Award Lengzem zana inlan turte an theuneu lo hle. Award hmasa lama che ṭha thei em em, Mizo Idol Hmangaihi a rawn che leh dawn a, tunlaia boruak nei lian mek, Youth Icon 2024 Lalsangliana (Taitea) pawh a rawn inlan dawn e. Anni bakah Ticos Dara, Siampuii Ralte, Lilac & Jacks, H.O.M, Mendal, Ruatpuii, The Radio leh Pablo x Mistablow te live-a an perform kan hmu thei dawn a, a pui lo thei lo.