Mizo Idol season 7 hmawr bawk a hnai chho zela, tunah chuan mi panga chiah intihsiakna beitu tur an awm tawh. Zanin hian intihsiak zan khatna an hmachhawn dawn.

David Lalchawisanga Darlong, Deborah VL Hmangaihi, T Vanlalhmangaihi, Lalngaihzuali leh C Vanlalroluahtumi-te chu top 5-ah an la inhlangkai a, zanin bakah hian karleh Thawhlehni zanah an intihsiak leh ang. Boruak a sang chho tawh a, an zai thiam tawh hlawm bawk si a, jugde-te lu an tihai leh map map dawn tih a chiang.

Contestant-te tan boruak a sang tawh dawn
Top 5 intihsiakna an zawh hunah hi chuan final round a ni tawp tawh dawn a, tin, top 3 chin lawmman tur a ṭha tih hretu vek kan ni bawk a, chuvang chuan zanin leh Thawhlehni zana an inel hunah hian an chetsual a thiang tawh lo a ni tawp. Hla an thlan fuh a ngai a, endiktute tihlungawina tur an ngaihtuah tel a ngai bawk. Contestant-te tan chuan boruak a rit khawp ang le.

Amaherawhchu, zai thiam tak tak vek an ni tawh. Tripura aṭanga Mizo Idol intihsiaknaa tel tura rawn kal vang vang David-a hi intihsiak chhunga vawi khatmah la chesual lo a ni, tiin sawi ila kan sawi sualin a rinawm loh. A zai apiang ngaihthlak a nuam em em. Chumai a la ni lo, top 5-ah mipui vote a hmuh ṭhat ber avanga inhlangkai a ni tih hre bawk ila, a elpuite tan a ni hi elpui huphurhawm tak tur a ni hial ang.

Lunglei Zotlang nula Deborah-i hi audition round leh 1st round aṭang tawha mi tam tak Idol a ni der tawh. A hla sak tur a thlang thiam em em a, judge-te tan pawha sawiselna tur awm lo khawpin a zai ṭha ṭhin. "I sak tur tak i sa a ni," tiin endiktu lamin a zai an comment fo bawk. A zai mipuiin an ngaihthlak chak ber pawl a ni bawk.

Mizorama zaipawl kan neih ṭhat ber zinga mi Besy Choir-te'n kum 16 lek a nih laia zaipui tura an sawm hial tawh, Hunthar Veng nula T Vanlalhmangaihi pawh hi ṭantu ngah ber zinga mi a ni. A zai thiam zia sawi nawn a ngai lo a, ama 'style'-a kal lui ngat ngat, contestant zinga amaha theihna awm hai chhuak thei hmasa ber zinga mi a ni.

Zonuam nula Lalngaihzuali pawh hi a che chhe ngai lo. Thawhlehni liam ta zana David Sonata hla phuah 'Ka hmangaih Isua' a sa phei kha chu pui tak a ni. Hmabak nei eng ber zinga mi a ni a, tin, hla kan hriat ṭhin dan mai ni lo, her danglama mark hmu sang tura risk la huai ngam ber a ni, ti ila kan sawi sualin a rinawm loh.

Aw 'range' zau tak C Vanlalroluahtumi (Tumtumi) hi fan ngah ber zingah a tel. A aw 'range' a zau tih a hria a, chumi phochhuak thei tur hla chu a thlang thiam hle lehnghal a, hla soft lam aṭanga rock hla thlenga sa thei a ni tih a lantir tawh bawk. Saichal nula zai hi mipui ngaihthlak chak ber zinga mi a ni dawn tih a chiang.

Mizo Idol S7 contestant tla tawh ṭhenkhat inlan tur an awm
Mizo Idol season 7 top 10 inhlangkai zo lo zai thiam tak tak nisi mi pathum inlan tur an awm.

Zai thiam tak, top 50 intihsiaknaa damlohna avanga zai zo thei lo Lalchhandama Khiangte kha kan hmu leh dawn. Dam ṭha se chu sang tak thleng tura beiseiawm pawl a ni. Zaninah a zai kan ngaithla leh dawn.

Armed Veng South nula Zodinpuii Sailo, top 20 intihsiaknaa 'Jerusha' thiam taka satu kha stage lian zawkah a rawn inlan leh dawn bawk a, ani bakah hian Top 10 inhlangkai zo ta lo Chhiahtlang nula C Lalrindiki chu a inlan dawn bawk.

Season 6 lam hmel kan hmu dawn
Mizo Idol season 6-a thleng sang tak takte an inlan dawn. Andrew K Lalchhandama, R Lalmalsawmi leh Malsawmkimi te chu zanin hian an inlan dawn a ni. Mizo Idol 2018-a ui tak chunga mipuite'n an thlah takte rawn inlan tur hi show tihlutu tak tur pawh a ni.