'Top Gun: Maverick' a rawn invawrh leh

North America Box Office-ah kar tawp liam ta khan 'Top Gun: Maverick' chu pakhatna a ni.

Kar hmasa lamah khan 'Top Gun: Maverick' hi palina a ni a, kar tawp liam taah erawh kha chuan a chunga awm zawng zawng rawn thlawh khumin sum lalut tam ber a rawn ni leh. He film hi kar tawp liam ta chhung khan theatre 3,113-ah chhuah a ni a, $6,014,128 lai lalut lehin sum lakluh kawngah hma a rawn hruai leh ta a ni. US-ah ringawt Top Gun 2 hian $701,250,369 a lalut tawh a, ram hrang hrang aṭanga a sum lakluh tawh zat belhkhawm chu $1,441,650,369 a ni a, kumin chhunga film tlangzarh tawh zingah chuan sum lalut tam ber a ni mek bawk.

Bullet Train chu a dinhmun ngaiah ding lehin theatre 3,117 aṭangin $5,784,726 a lalut a, pahnihna a ni leh.

'Spider-Man: No Way Home' chu theatre-a chhuah turin an tlangzarh thar leh a, theatre 3,935 aṭangin $5,403,230 lai a lalut leh. He film hian ram hrang hrang aṭangin $tluklehdingawn 1.91 a lalut tling tawh a ni.

Box Office top 10:-
1 Top Gun: Maverick $6,014,128
2 Bullet Train $5,784,726
3 Spider-Man: No Way Home $5,403,230
4 DC League of Super-Pets $5,035,154
5 The Invitation $4,876,327
6 Beast $4,028,820
7 Minions: The Rise of Gru $3,509,080
8 Thor: Love and Thunder $2,673,788
9 Jaws $2,638,285
10 Dragon Ball Super: Super Hero $2,405,000