Apple-in iPhone 14 tlangzarh ta; Vawiin aṭangin pre-order theih dawn

Apple iPhone ngainatute'n an nghahhlelh iPhone 14 chu Apple chuan a tlangzar ta rup mai le. iPhone 14 hi series pali an tichhuak a, iPhone 14, iPhone 14 Plus, iPhone 14 Pro leh iPhone 14 Pro Max-te an siam a ni.

iPhone 14 Pro model chinah chiah hian Apple chuan A16 Bionic chip an dah a, a bak zawngah hi chuan iPhone 13 lama an hman A15 Bionic chip kha an dah thung.

Apple hian an phone tihchhuah tharah hian feature thar tam tak an rawn tihṭhat bakah an dah belh a, an inchhuanna ber pakhat camera an rawn thuam ṭhat bakah satellite connectivity-te an rawn dah tel tawh a, a phone ṭhatna hmang chhuak thiam tan chuan phone awhawm tak leh lei ngei tur chi a ni dawn.

India rama news site hrang hrangin an tarlan dan chuan vawiin aṭang hian iPhone 14 leh 14 Plus-te hi India ramah a pre-order theih tawh dawn a, iPhone 14 bik hi chu September 16 aṭangin a lei theih tawh dawn laiin Plus model chin hi chu October 7-ah an zuar chhuak dawn chauh thung.

Rawng chi hrang hrang- deep purple, silver, gold leh space black-te a awm a, a model azirin 6.1 inch leh 6.7 inch-te a awm dawn a, screen en zawng pawh 1600-2000 nits a ni. A variat azirin 128GB, 256GB, 512 GB leh 1TB storage-te a awm bawk a ni.

iPhone 14 hi Rs 79,900 man aṭangin a awm a, Plus variant chu Rs 89,900 aṭanga inṭanin storage azirin heng variant pahnihte hi nuai chuang man thlengin a awm.

Apple iPhone 14 Pro chu Rs 1,29,900 man aṭanga inṭanin 1TB storage chu Rs 1,79,900 man lai a ni thung a, iPhone 14 Pro Max Rs 1,39,900 man aṭangin a inṭan dawn a, a man to ber 1TB chu Rs 1,89,900 zet a ni dawn bawk.

Apple hian iPhone thar an tlangzarh rual hian Apple Watch Series thar leh AirPods thar an tlangzarh bawk a ni.