'Top Gun: Maverick' chu a la thlawh san chhunzawm zel a, kar liam ta chhung khan North America Box Office-a sum lalut tam ber a ni leh.He film hi theatre 4,751-ah chhuah leh niin $90,037,011 lai a lalut leh a, US-ah ringawt $295,641,022 lalut tawhin ram dang aṭanga a sum lakluh tawh nena belhkhawm chuan $557,241,022 lai a lalut tawh.
Kumina film tlangzarh sum lalut tam palina a ni der tawh!
Tlangzarh a nih aṭangin kar hnih erh awrh chiah a la liam a, chuti chung chuan kumin chhunga film tlangzarh tawh zingah chuan sum lalut tam palina ani der tawh a, tun anga a sum lakluh hi a pung chho zel a nih chuan sum lakluh tam kawngah 'Doctor Strange in the Multiverse of Madness' leh 'The Batman'-te nen an inel chho hle dawn niin a lang.
Tun dinhmuna sum lalut tam ber chu 'Doctor Strange in the Multiverse of Madness' a ni a, $909,411,116 lalut tawhin 'The Batman' chuan a dawt a, $770,337,628 a lalut ve tawh thung a ni.
Top Gun siamtute an khing tlat mai!
Box Office lamah sang taka thlawkin a hlawhtlinna lawm a nih mek laiin 'Top Gun: Maverick' siamtu Paramount Prictures lam chu copyright infringement chungchangah an khing tlat mai.
Kum 1986-a tihchhuah 'Top Gun' film kha Israeli writer Ehud Yonay article ziah 'Top Gun' behchhana siam a ni a, tuna a chhunzawmna an siam tur hian Ehud Yonay chhungte chuan Paramount Prictures lam hian 'rights' an nei lo nia sawiin Thawhṭanni khan Los Angeles federal court-ah thubuai an thehlut.
Thubuai thehlutu hi Ehud-a'n a boral san tak a nupui Shosh leh a fapa Yuval Yonay-te an ni. Top Gun 2 tlangzarh a nih hma hian film siamtute chuan kum 1983-a tihchhuah California magazine-a article tihchhuah 'rights' chu US Copyright Act hnuaiah a nei lo tih an sawi. Paramount Top Gun franchise pawh chu Ehud-a thuziak tel lo chuan a awm dawn lo tih sawiin kum 2018 khan Ehud-a article 'rights' an neih chu kum hnih hnuah a tawp tawh dawn tihte pawh Paramount hnenah an hrilh tawh thu an thubuai thehluhah chuan an ziak tel a ni.
Paramount lam chuan thuchhuah an siamah an laka thubuai thehluha awm chu awmze nei lo a nih thu leh an inven zel dawn thu an sawi ve bawk.
Duktawk ang, film thar dang sawi ang
Top 10-ah film thar pahnih a lang a, pasarihna 'Vikram' leh 10-na 'Crimes of the Future' chu film thar an ni. Box Office mojo chart-ah film 54 lai an tarlang a, chung zingah chuan Watcher (11), Deep in the Heart: A Texas Wildlife Story (16), Eiffel (20), Benediction (24), Maika (28), The Phantom of the Open (30), Poser (32), Neptune Frost (35) leh Kill Devil Hills (42)-te chu film thar an ni bawk.
Box Office top 10:-
1 Top Gun: Maverick $90,037,011
2 Doctor Strange in the Multiverse of Madness $9,173,176
3 The Bob's Burgers Movie $4,638,080
4 The Bad Guys $3,341,700
5 Downton Abbey: A New Era $3,196,020
6 Everything Everywhere All at Once $2,020,892
7 Vikram $1,770,000
8 Sonic the Hedgehog 2 $1,706,434
9 The Lost City $1,367,052
10 Crimes of the Future $1,117,962
