Mizoram Rockschool Teacher's Meet hmang mek

Khawvel huapa International Music Exam Board ṭha leh rintlak zinga mi Rockschool chuan Mizoram chhunga Music School, an Syllabus hmanga zirtirtute pualin inrawnkhawmna hun an buatsaih a, nimin leh vawiin hian hemi pual hian hun an hmang ang.

RSL Center Mystique, Aizawl-ah hun an hmang a, Aizawl chhung leh pawn lama Music school-a zirtirtu an kal ṭha hle. RSL India aiawhin Arup Gohain, Business Development Manager, Rahul K, PAA Business Development Manager leh Zothanmawia LAR, Mizoram-te chu hun hmangtu an ni.

Vawiin hian Music Production leh Dance school zirtirtute pualin hun an hmang dawn a ni.

Kum 2012 aṭangin Mizoramah Rockschool London Syllabus hmangin Music exam hi hmachhawn ṭan a ni a, he Syllabus hmang music zirtir thei tur pawh pun belh hret hretin tunah chuan District hrang hrang- Aizawl, Kolasib, Serchhip, Champhai leh Saitual-a Music zirna 20 chuang aṭangin International Music Exam hi an hmachhawn thei hial tawh.

Mizoramah hian RSL exam hmachhawn zirlai 384 an awm tling tawh a, subject hrang hrang aṭanga Grade 8 pass tawh zirlai 50 chuang an awm tawh bawk.

Rockschool-in a tum ber chu Music hmanga hmasawna (Music Education) pek a ni. Musical Instruments chi hrang hrang bakah, Music Production, Podcasting, Performing Arts (Jazz, Theater, Street Dance) te a zir theih.