Kum 2020, hripuiin Mizoram min nuai tak tak hma lawka Chapchar Kut ropui taka kan hman ṭuma Lily Veng Cultural and Drama Club leh Sound From The Hills band-te'n Liandoa te unau dar hla leh Mizo hmasang hla leh hlado chham inpawlha rimawi mawi tak min ngaihthlak tir paha show hmuhnawm tak min thlirtirtute kha i la hria em? I la hria a, i mit leh beng a tlai a nih chuan karleh Thawhlehni zanah hian khami te vek khan Mizo musical film 'Liandoa te unau' chu Zonet lamah thlir phaha ngaihthlak turin a awm dawn a, lo inralring tawp mai teh.

Sound From The Hills leh Zonet ṭangkawp chuan he Mizo musical film hi an buaipui a, karleh Thawhlehni zan dar 8-ah hian Zonet YouTube channel leh Zonet Zawlbukaah thlira ngaihthlak theihin a awm dawn.

Chanmari Branch KṬP in thiam taka an chan ṭhin, Hnehtu Ropui script ziaktu Vanneihtluanga script ziah a ni dawn bawk a, a nep thei lo. A hmuhnawm ang tih a chiang a, tin, Sound From The Hills hi Mizo guitarist zinga thleng sang ber pawl Boomarang guitarist Boom Boom-a te band an ni a, rimawi lam tuipui tan chuan show hmuhnawm tak a nih dawn piah lamah beng a tlai dawn hle tih a chiang bawk.  

Anni hian Lily Veng Cultural and Drama Club, C. Luri, G'nie, SayedRahiUmair, SuchetaBhattacharjee, leh Esther Hnamte-te an la thawhpui cheu. Lily Veng Cultural and Drama Club hi chuan show hmuhnawm turu min hmuhtir a rinawm sa a, artist dang lar tak takte hi eng ang takin nge an inlan dawn hriat a la ni lo a, a rap/zai thawm ngaihthlak tur a awm mai thei a, an hmel pawh kan hmu mai thei!

Liandoa te unau bur chhete kha 

Liandoa bur chhete kha bur chhete a ni reng em? He musical film hian hnam dang, a bikin sap leh kan vai kan tih maite'n rimawi tumna hmanrua ṭha tak tak an neih laiin keini Mizote chuan hmasang aṭang khan Darbu kan lo nei ṭhin a, chu chu he film hmang hian rawn chawisang leh an tum dawn a nih hmel.

"Dar zawng zawnga dar huai ber, rimawi zawng zawnga mawi ber neitu ka ni lo’m ni kha?" tiin he play-ah hian thiam takin an rawn chham chhuak dawn a, "Mil loh nei lo, rem loh nei lo, rimawi tinreng mawina belhchhahtu Liando Dar ri chu ngai teh, a thang mawi zel dawn e khua velah," tiin he script ziaktu hian a tarlang hial! He musical film i en zawhah hi chuan Liandoa bur chhete kha i tan bur hlu tak a ni tawh mai thei a ni.

"    Liando te unau unau

    Dar zeng nge in tum in tum?

    Dar zeng mah kan tum love

    Liando bur chhe te kan tum kan tum"

(Mizo Dar Hmingthangte p.16; C.Lalaudinga)

Liandoa te unau thawnthu hmanga dar hla an phuah a ni, Surbung khua ni a sawi an ni a, rulpui pumpui aṭanga an hai chhuah dar a ruka an tum ṭhin thawnthu aṭanga dar hla a phuah a ni.Liandoa te unau