Elon Musk hun a thleng ta

Bill Gates hun a liam a, Amazon founder Jeff Bezos-a hun a rawn thleng leh a, kum 2017 hnu lamah kha chuan khawvelah tunge hausa ber tia zawhna awm chu Jeff Bezos tiin kan chhang ṭhin. Tunah erawh channa dang kan neih a ṭul dawn ta! Tesla leh SpaceX entrepreneur Elon Musk chu khawvela mi hausa ber a ni tawh.

Ningani khan Tesla share price hi nasa takin a pung a, Musk-a electric car company hlut zawng hi $tluklehdingawn 700 a ni tawh a, Toyota, Volkswagen, Hyundai, GM leh Ford hlutna belhkhawm ai pawhin hei hi a tam zawk!

Elon Musk-a hausakna hi $tld 185 hu a ni tawh a, Jeff Bezos aiin a hausa tawh zawk a ni.

'Tesla Owners of Silicon Valley' chuan Twitter-ah Musk a hausa ber tawh tih hi tarlangin hei hi Elon Musk chuan "How strange" tiin a lo chhang tehtlat bawk a, a hnuaiah "Well, back to work ..." tiin a chhang zui leh bawk.

Kum 2018 khan Elon Musk hian twitter-ah,"Ka pawisa neih zatve hi chu khawvela buaina awm ṭanpuina tura tih a ni a, a chanve dang hi chu khawvel arsi tlain a den hun emaw Indopui III-na emaw keimani kan intihchhiat vek hunah emawa thilnungte an dam chhunzawm zel theihna tura Mars-a self-sustaining city dinna tur a ni," tiin a lo sawi tawh a ni.

Ka pawisa neih zatve hi chu khawvela buaina awm ṭanpuina tura tih a ni a, a chanve dang hi chu Sikeisena self-sustaining city dinna tur a ni

Elon Reeve Musk hi business magnate, industrial designer leh engineer a ni a,  SpaceX  founder, CEO, CTO leh chief designer a ni bawk. Tesla.Inc-ah CEI leh product architect a ni a,  The Boring Company founder,  Neuralink co-founder leh OpenAI co-chairman a ni bawk.

Musk hi kum 49 a ni tawh a, a nu hi Canadian a ni a, a pa chu South African ni thungin kum 2002 khan Space X hi a din a ni.

SpaceX lampum chu Space Exploration Technologies Corp. niin Elon Musk hian Sikeisena mihring an chen theihna tur rilrua dah chunga a din a ni