54th Annual Country Music Association Awards (CMA) chu Nilaini khan  Music City Center, Nashville, Tennessee-ah sem a ni a, Maren Morris chu award la hnem ber niin pathum a la a, Luke Combs chuan pahnih a la bawk.

CMA 2020 hi  Reba McEntire leh Darius Rucker-te chuan an host a, award ngaihhlut Entertainer of the Year chu Eric Church-in a dawng a ni.

Award dawng tam ber Maren Morris hian a hla 'The Bones' hmangin Single of the Year award a dawng a, Song of the Year a dawnpui bawk. Female Vocalist of the Year award dawng bawkin award hum haw hnem ber a ni. Award dawng hnem ber dawttu chu Luke Combs niin Male Vocalist of the Year award a dawn bakah a album 'What You See Is What You Get' chu Album of the Year a lakpui.

Morgan Wallen chu New Artist of the Year atan thlan niin Miranda Lambert 'Bluebird' chu Music Video of the Year atan thlan a ni bawk.

Kumin CMA-ah hian perfomer an ṭha hle a, show hawnna atan  Charlie Daniels tribute pual ni pahfawmin Jason Aldean, Dierks Bentley, Brothers Osborne leh Ashley McBryde-te an perform ho. Kumin award ceremony hi hripui leng kara neih ni mah se virtual ceremony a ni lem lo a, a hmuna chhimtu erawh an tam lo thung.

Gabby Barrett leh Charlie Puth-te chuan 'I Hope' an sa a, Entertainer of the Year  award dawngtu Eric Church chuan 'Hell of a View' a sa bawk.

Luke Combs chuan 'Cold as You' a sa thung a, Miranda Lambert pawhin 'Settling Down' a sa bawk. Thomas Rhett, Reba McEntire leh Chris Tomlin-te'n 'Be a Light' an sakin sawizui a hlawh a, Little Big Town chuan Kenny Rogers pualin 'Sweet Music Man' an sa bawk a ni.

Anni bakah hian Maren Morris, Keith Urban leh country singer eng emaw zat an zai.

CMA-ah hian a vawi khatna atan pop singer lar Justin Bieber chu a inlan a, 'Sorry' hitmaker hian Dan + Shay thawhpuiin '10,000 Hours' an sa a ni. Anni hi Hollywood Bowl aṭangin an peform thung. He hla hi award la chiah lo mah se nomination pathum lai a hmu a, Single of the Year, Music Video of the Year leh Musical Event of the Year category-ahte nomination a hmu a ni.