Christian music huangchhunga chawimawina sang Annual GMA Dove Awards vawi 50-na chu October 15 hian Nashville, Tennessee-ah neih a ni dawn a, award dawng tur nomination tihchhuah zingah 'This Is Amazing Grace' hit maker Phil Wickham chuan nomination pali a hmu.
Phil Wickham hian nikum khan 'Living Hope' album a tlangzarh a, hemi hmang hian nomination pali a hmu a ni. 'Living Hope' hi Worship Album of the Year nomination zingah a tel a, a title track hi Song of the Year, Worship Song of the Year leh Worship Recorded Song of the Year atante nominate a ni bawk.
'Living Hope' hi a hit hle a, vawi maktaduai 42 vel zet 'stream' a ni tawh a, Billboard Christian Radio hit top 10-ah a lang phak bawk a ni. Khawvel hmun hrang hranga biak-in leh worship-naahte tunlaiin sak hlawh ber zinga mi a ni.
Mizo ṭawng pawhin a hla eng emaw zat hi lehlin a ni tawh a, Mizo artiste-te pawhin an sa fo tawh.
50th Annual GMA Dove Awards hi Trinity Broadcasting Network (TBN) chuan October 20, Pathianni-ah an pechhuak dawn a, nomination-te hi August 21- 28 chhung hian vote tur a ni bawk.
Hetihlai hian Bethel Music chuan nomination 14 zet a hmu thung.
