Temple Corps SAY ten kumtina an buatsih ṭhin Coffee Nite chu December 24 zan hian a vawi 19 nan ropui taka hman a ni leh dawn.
He hunah hian zaithiam lar tak tak an inlan dawn a, band ṭha ber ber an perform dawn bawk.
Pathian rawngbawltu lar Frederick Lalrindika, Bethel Ministry speaker chuan hun a hmang dawn a, chhim a manhla dawn hle. Mizoram chief minister Zoramthanga chu 'Father of the Nite' a ni bawk ang.
Tute nge inlan dawn?
Kum dangah pawh zaithiam lar ber ber-ten hun an lo hmang tawh ṭhin a, kuminah pawh an che leh dawn. Coffee Nite-a perform tur hian mi 16 biak fel an ni tawh a, band pahnihin an tel tur thu an tichiang tawh bawk.
Mimal zai tur te hi - Sawmtea, Hlimhlimi, DJ Lalvenhimi, Ticos Darhmingliana, Jerry Lalrinawma, Ruatfeli, Rachel Lalnunkimi leh Esther-i te an ni. Hei mai hi a la ni loa - nikum lamah pawh lo perform tawh Kimkima a la awm cheu bawk. Zo rimawi khawvela hriat hlawh tak tak - Eunice, Duhsaki, Hmingtea, Teawmi leh Josephine-i te pawh mipui chawk hlim tur hian an penchhuak dawn a, hmaih phal chi rual a ni lo.
Band inlan turte hi Char Nambar leh Zonun band te an ni a, anni aia mipui chawkhlim thei tur an awm chuang lo. Kumina Chanmari Branch YMA ten an Diamond Jubilee puala Beat contest an buatsaih ṭuma pathumna, Char Namber band te hi Coffee Nite House Band atan thlan an ni. An vocalist hi vawi eng emaw zat a zai kan lo ngaitlak tawh ṭhin Josephine Lalramengi (Jojo-i) a ni.
MDC an che dawn
Coffee Nite-ah hian zaithiam aṭanga rawngbawltu leh ramhruaitu thlengin an kim dawn a, lam thiamte pawhin laitual an chhir dawn. Mizoram Dance Camp (MDC)-te an che dawn a, hei ngawt pawh hi chhim chhan tham tling a ni.
Kum danga an lo kalpui ṭhin tawh angin presenter atan mi hlawhtlingte sawm an ni leh dawn bawk. Heng bakah hian donor card siam a ni leh dawn bawk a, Rs. 6000.00 leh Rs. 200.00 man siam a ni a, heta ṭanga sum hmuh te hi hnuchham leh chanhaite tanpuin nan hman a ni ang.
Coffee Nite-ah hian sponsor aṭangin micromax TV 32 inches man theihna tur lucky coupon siam a ni dawn a, a kal zawng zawngte hnenah lucky coupon hi sem a ni ang. He hun ngaipawimawha kalte tan a thlawna Coffee in tur chhawp a ni dawn bawk.
