Milar zinga zawn hlawh ber Demi Lovato

American singer Demi Lovato chu milar zinga U.S mipuiten kum 2018 chhunga internet-a zawn nasat ber a ni.

Google chuan tun hnai khan 'Year in Search' data a tichhuak a, hetah hian Demi Lovato hian dinhmun sang ber hi a luah a ni. Eminem, Ariana Grande leh Duchess of Sussex Meghan Markle-te chu an langsar viau bawk.

'Year in Search' data-ah hian category hrang hrang a awm a, milar tak tak an kat nuk mai. People category-a zawn hlawh ber chu Demi Lovato a ni a, Meghan Markle chu pahnihna a ni. Khloe Kardashian, Eminem, Ariana Grande leh Cardi B te-chu top 10-ah an lang.

Music lamah pawh Demi Lovato bawkin No.1 a hauh a, American rapper Eminem chuan a dawt. Ariana Grande, Cardi B, Travis Scott leh Machine Gun Kelly-ten an dawt. Queen hla 'Bohemian Rhapsody' chu hla zinga zawn hlawh ber a ni a, 'This is America' chu pahnihna a ni. Hetih lai hian Drake hla hit 'God’s Plan' chu palina a ni a, a hla dang 'In My Feelings' chu parukna a ni bawk.

Mac Miller

Mitthi zingah rapper Mac Miller chu zawn nasat ber a ni a, American comic book writer lar Stan Lee chu palina a ni. August thla-a boral Aretha Franklin leh rapper XXXTentacion-te chu an langsar hle. Swedish musician lar famta Avicii chu American mipui-ten an ngaihven berte zinga mi a ni bawk.

Movie lamah

Movie lamah Black Panther chu American mipuiten an en nasat ber a ni a, Incredibles 2 leh Deadpool 2-ten an dawt. Avengers: Infinity War chu palina a ni a, A Quiet Place chu panga-na a ni.

Actor zingah Logan Paul chuan No.1 a hauh a, Bill Cosby chu pahnihna a ni. Sylvester Stallone pawh a kum tam deuh tawh mah se mipui ngaihven zingah a la tel a, Bradley Cooper leh Chadwick Boseman-te an langsar viau bawk.

Lady Gaga channa A Star is Born pawh a thleng sang hle a, Tom Hardy channa Venom leh The Nun-te nen top 10-ah an lang. TV Show zingah Roseanne chu mipui ngaihnat ber a ni a, American Idol chu palina a ni phak ṭawk thung. Milar fa nei zingah Kylie Jenner chu huhang ngah ber a ni a, Cardi B a langsar viau bawk.

Nupa tuak thar

Kumin May thlaa innei Prince Harry leh Meghan Markle-te chu mipui ngaihven ber an ni a, Indian actress Priyanka Chopra leh Deepika Padukone-te pasal neihin thawm a nei ring hle bawk. American singer Nick Jonas leh Priyanka Chopra-te hian pahnihna an hauh a, Bollywood star Deepika Padukone leh Ranveer Singh-te chu top 5-ah an lang bawk.