Synfo leh Inkspot Digiprint Solution te buatsaih, Praise On chu Zirtawpni zan khan final result puan a ni a, R. Lalrinmawii, Leitan Branch chu a thiam ber.

Kar kalta Thawhlehni zan leh Ningani zanah te Top 10 ten intihsiak an tih hnuin, Zirtawpni zan khan Praise On recult puan inkhawm neih a ni. Central KṬP leader, Rev. Zothansanga'n hunserh a hmang a, Mizoram Synod Choir an zai a, hemi hnu hian award pali an siam chu sem a ni. Top 50 aṭangin Noel Vanlalruatpuii, Thingdawl Branch leh F. Lalngaihzuala te an solo a, Rev. PC Pachhunga, Executive Secretary i/c MSSU etc chuan special a award a sem zawh hnuin result hi puan a ni.

R. Lalrinmawii, Leitan Branch chu Praise On-a pakhatna a nih thu puan a ni a, pahnihna hi Zorinsanga Sailo, Ramhlun North a ni a, pathumna hi Tlangnuam Branch-a mi, Cindy Lalthanpuii a ni. Pakhatna hian Rs. 80,000 a dawng a, pahnihnain Rs. 40,000 leh pathumnain Rs. 20,000 an dawng. Hei bakah hian Casio keyboard an dawng vek bawk a, citation leh trophy an dawng tel bawk a, an branch te hnenah microphone pek an ni bawk.. Synfo chuan pakhatna aṭanga pathumnate hi a thlawnin music video a siamsak vek bawk ang. Top 10-a lang chinte hian Rs. 5,000 ṭheuh an dawng.

Award dang semah hian Tlangnuam Branch, Cindy Lalthanpuii chuan Best Performance Award a dawng a, Lalruatfeli, Lunglei Chanmari Branch chu Most Inspirational Performance-a thlan a ni. Irene Laldingngheti, Tuikual South Branch chu Most Promising Artist-a thlan a ni a, KṬP Bungkawn Branch chu tun Praise On-a branch pakhat
aṭanga tel tamna ber an nih avangin Best Participation Award hlan an ni. Bungkawn Branch aṭang hian mi 12 lai an tel.

Arini hian Praise On pakhatna a ni chu inrin thiam a har a ti a, a inring lo lutuk zawk a, 'Tun thleng hian pakhatna ka ni ang tih pawh ka la ring thei lo a ni," a ti. "Midang zawk pakhatna ni tur hian ka la ring tlat mai a ni," a ti.

Pakhatna ni ta hi a inbuatsaih nasa hle a, zai ngawr ngawr mai bakah a taksa a fit ṭhat loh chuan a zai ṭha thei lo ang tih a hria a, zingah exercise lain a bei ṭan ṭhin. Intihsiak hma aṭang tawh khan a hla sak tur thlang lawkin a zir tawh a, ṭawngṭaina nen, Pathian rawn chungin a bei a, a hla sak tur a tih tawh ṭhenkhatte chu a thlak phah nghe nghe. An Branch pum mai bakah, a chhungte leh a unau ten nasa takin an pui a, an phurpui hle. Hunawl a neih apiangin a lo zir lawk a, biak in rehearsal a nei leh ṭhin. Pakhatna a nih lawm turin an inbuatsaih mek.

R. Lalrinmawii

Nu leh pa R. Zarzokima leh Lalduhkimi Khiangte

Hla duh ber 'Khawngaihna thing kraws'

Bible châng Sam 37:5 leh Nahuma

duh ber 1:7